گیتمه لی سن

صاحب مُلک سلیمان اولاســان گیتمه لی سن

بـیـر تَفَکُّر ایله گـور خلقتیـویـن سِرّی نـدی

خاک تیره مه تـابـان اولاسان گیتمه لی سن

عُمـر نــوح اولسا نصیبون بو فنا دنیاده

شُهره ی عالم امکان اولاسان گیتمه لی سن

مسخره ایلـمـه گـولـمه بیرینین صورتینه

حُسنوده یوسف کـنـعـان اولاسان گیتمه لی سن

قـــالمادی حضرت موسایه ده فانی دنیا

طـور سیناده نگـهبـان اولاسان گیتمه لی سن

مصطفی تک بشره دنـیـا وفا ایلمدی

خـتــم پیغـمبره دربان اولاسان گیتمه لی سن

هانی گــور فـــاتـح خیبر کیمی شیر غزوات

مــوهـبتده شه مردان اولاسان گیتمه لی سن

گور یزیدی اولوسان یا که طرفدار حسین

دشمن و حامی قرآن اولاسان گیتمه لی سن

چوخــدا فخر ایلمه اوز دولتیوه قدرتیوه

دهریده رستم دستان اولاسان گیتمه لی سن

قویما مغرور ایلیه چوخدا سنی پُست و مقام

آمر و تابع فرمان اولاسان گیتمه لی سن

متواضع بشر اُول اولماگیلان اهل غرور

نه قَدَر فخریلی انسان اولاسان گیتمه لی سن

اللها ایله عبادت نه قَدَر وار نفسون

طالب و مُنکِر ایمان اولاسان گیتمه لی سن

گیدیسن مَکّیه گل حرمتینی حفظ ایله

میشه قربان حاجی قربان اولاسان گیتمه لی سن

منظوریم بیر بیله سوزدن بودی ای بنده اینان

باغ عشرتده غزلخوان اولاسان گیتمه لی سن

چوخلارین چـرخ فـلـک گـولــدیـروب آغـلار قویدی

غنچه تک عمریده خندان اولاسان گیتمه لی سن

ایندی که حقدی ئولیم محشره سرمایه قازان

صاحب مال فراوان اولاسان گیتمه لی سن

کاخ و ویلاده اوتور قبر ایوینی یادیوه سال

عاقبت خاکیله یکسان اولاسان گیتمه لی سن

اجلین وقتی یتیشسه قاچاجاقسان هایانا

عازم دشت و بیابان اولاسان گیتمه لی سن

هارا گیتسون سنی بیر گون تاپاجاخ عزرائیل

یرین آلتیندا دا پـنـهـان اولاسان گیتمه لی سن

ای (فـتــا) شعری اوتور آخرتین فکرینه قال

(حافظ) و (سعدی)دوران اولاسان گیتمه لی سن